माइतीघर मण्डलमा लघुवित्त ऋणीहरूको आन्दोलनका क्रममा पक्राउ परेका तीन जना जेनजी अभियानीसँग जिल्ला प्रशासन कार्यालय काठमाडौंले प्रतिव्यक्ति एक लाख रूपैयाँ धरौटी माग गरेको छ । तोकिएको धरौटी रकम तिर्न नसक्ने बताएपछि प्रशासन कार्यालयले उनीहरूलाई बुधबार सुन्धारास्थित कारागारमा पठाउने आदेश दिएको हो ।
सार्वजनिक शान्तिविरूद्धको कसुरमा गत साउन १३ गते साँझ माइतीघर मण्डलबाट प्रहरीको नियन्त्रणमा परेका अभियानीहरू अजय सोडारी, प्रकाश बम र सुनिल बिक सोही दिनदेखि नै थुनामा थिए । माइतीघरमा आन्दोलनरत लघुवित्त ऋणीहरूलाई उक्साएको आरोपमा प्रहरीले उनीहरूलाई नियन्त्रणमा लिएको थियो ।
जिल्ला प्रशासन कार्यालयका सहायक प्रमुख जिल्ला अधिकारी मुक्तिराम रिजालले धरौटी रकम बुझाउन नसकेपछि उनीहरूलाई नियमअनुसार थुनामा पठाइएको पुष्टि गरे । उनका अनुसार यो प्रमुख जिल्ला अधिकारी (सिडिओ) स्वयंले हेर्ने नियमित प्रक्रियाअन्तर्गतको मुद्दा हो र धरौटी नबुझाएकाले उनीहरूलाई थुनामा राखिएको हो ।
यता अभियानी अजय सोडारीको समूहकी प्रतिनिधि सुप्रिया नेपालीका अनुसार सुरूमा प्रतिव्यक्ति १० हजार रूपैयाँ धरौटीमा छाड्ने कुरा भएको थियो । विद्यार्थी भएकाले १० हजार रूपैयाँ पनि तिर्न नसक्ने भनी सिडिओसँग कुरा राखेपछि एक्कासि प्रतिव्यक्ति एक लाख रूपैयाँ धरौटी तोकिएको खबर आएको उनले बताइन् । एक लाख धरौटी तोकिएपछि यसबारे पुन: कुरा गर्न सिडिओलाई भेट्न खोज्दा कार्यालय बन्द भइसकेको भन्दै प्रवेश गर्न नदिइएको र जेनजी अभियानीहरूमाथि माथिको आदेश भन्दै प्रतिशोध साधेर थुनामा राखिएको दाबी उनले गरेकी छन् ।
