विश्वप्रसिद्ध अमेरिकी राइड–हेलिङ कम्पनी उबरले काठमाडौंमा आफ्नो सेवा परीक्षण (टेस्ट ड्राइभ) सुरु गरेको छ। नेपाली कम्पनी ट्याक्सीमान्डुसँग रणनीतिक साझेदारी गर्दै उबरले नेपालमा औपचारिक प्रवेश गरेको हो ।
ट्याक्सीमान्डुका संस्थापक अर्जुन केसीका अनुसार आजदेखि उबरको मोबाइल एपमार्फत काठमाडौंमा राइड बुक गरेर यात्रा गर्न सकिनेछ । हाल सेवा परीक्षणका रूपमा सञ्चालन गरिएको छ भने एक सातादेखि १० दिनभित्र उबरले औपचारिक रूपमा नेपालमा सेवा सुरु गरेको घोषणा गर्ने तयारी गरेको छ ।
ट्याक्सीमान्डुले उबरको प्रविधि नेपालमा भित्र्याउने, परीक्षण गर्ने, चालक खोज्ने तथा उनीहरूलाई तालिम दिने जिम्मेवारी पाएको छ। यसअघि ट्याक्सीमान्डुले याङ्गोलाई पनि नेपालमा भित्र्याउन सहजीकरण गरेको थियो ।
उबर नेपालमा शतप्रतिशत विदेशी लगानीमा सञ्चालन हुने भएको छ । कम्पनीले २०७४ साउन १ गते नै ‘उबर नेपाल’ नाममा कम्पनी दर्ता गराएको थियो । हालको विदेशी लगानी तथा प्रविधि हस्तान्तरण ऐनले सूचना प्रविधि क्षेत्रमा पूर्ण विदेशी लगानीको अनुमति दिएको छ ।
उबरले विश्वभर कार, बाइक, ट्याक्सी सेवा, खाना तथा औषधि डेलिभरी, पार्सल र कार्गो ढुवानीलगायतका सेवा प्रदान गर्दै आएको छ । नेपालमा भने सुरुमा राइड–सेयरिङ सेवामै केन्द्रित हुने अपेक्षा गरिएको छ ।
हाल नेपालमा पठाओ, इन्ड्राइभ र याङ्गोले सेवा दिइरहेका छन् । उबरको आगमनसँगै नेपालमा राइड–सेयरिङ क्षेत्र थप प्रतिस्पर्धी बन्ने र यसको कानुनी व्यवस्थाबारे नयाँ बहस सुरु हुने देखिएको छ ।
