एआई (कृत्रिम बुद्धिमत्ता) प्रविधिको तीव्र विस्तारसँगै मेमोरी र स्टोरेज चिपको लागत बढेपछि एप्पलले आफ्ना केही लोकप्रिय उत्पादनको मूल्य वृद्धि गरेको छ ।
तत्काल लागू हुने गरी एप्पलले प्रवेश-स्तरको म्याकबुक नियोको मूल्य ५९९ डलरबाट बढाएर ६९९ डलर पुर्याएको छ । त्यस्तै, सबैभन्दा सस्तो आइप्याडको मूल्य ३४९ डलरबाट ४४९ डलर पुगेको छ भने आइप्याड मिनीको मूल्यमा १०० डलर वृद्धि गर्दै ५९९ डलर कायम गरिएको छ ।
यसका अतिरिक्त एप्पल टिभीको मूल्य १२९ डलरबाट बढेर १९९ डलर पुगेको छ । एप्पल भिजन प्रो हेडसेटको मूल्य २०० डलरले बढेर ३,६९९ डलर कायम भएको छ भने होमपड स्पिकरको मूल्य २९९ डलरबाट बढेर ३४९ डलर पुगेको छ ।
नयाँ मूल्य बिहीबारदेखि एप्पलको अनलाइन स्टोरमा लागू भइसकेको छ । यद्यपि, केही तेस्रो-पक्ष खुद्रा विक्रेता वेबसाइटहरू, जस्तै बेस्ट बाइ र टार्गेटमा भने पुरानै मूल्य देखाइएको छ ।
एप्पलले जारी गरेको वक्तव्यमा विश्वभर निर्माण भइरहेका एआई डाटा सेन्टरहरूको बढ्दो संख्याले मेमोरी र स्टोरेज चिपको मागमा असाधारण वृद्धि गराएको जनाएको छ । कम्पनीका अनुसार यति छोटो समयमा कम्पोनेन्टको मूल्य यति धेरै बढेको अवस्था यसअघि कहिल्यै देखिएको थिएन ।
कम्पनीका प्रवक्ताले भने, “हामी यस्तो अवस्थामा पुगेका छौं जहाँ आइप्याड र म्याकजस्ता केही उत्पादनको मूल्य बढाउन बाध्य भएका छौं । यो उपभोक्ताका लागि सुखद समाचार होइन भन्ने हामीलाई थाहा छ र समाधान खोज्न निरन्तर प्रयासरत छौं ।”
मूल्यवृद्धिको घोषणापछि एप्पलको सेयर मूल्य बिहीबार बिहान ४.५ प्रतिशतले घटेको छ, जुन पछिल्ला चार महिनाकै सबैभन्दा ठूलो दैनिक गिरावट हुनसक्ने अनुमान गरिएको छ ।
एप्पलका प्रमुख कार्यकारी अधिकृत (सीईओ) टिम कुकले गत साता नै मेमोरी चिपको अभावका कारण मूल्य वृद्धि “अपरिहार्य” भएको चेतावनी दिएका थिए । एआई डाटा सेन्टरहरूको तीव्र विस्तारका कारण चिपको माग र मूल्य दुवै बढेका छन्। यही कारण चिप निर्माता कम्पनीहरू, विशेषगरी माइक्रोनले हालै उल्लेखनीय आम्दानी हासिल गरेका छन् ।
कुकले यसअघि भनेका थिए, “हामीमाथि थपिएको लागत वृद्धिलाई सकेसम्म कम गर्ने प्रयास गरिरहेका छौं र ग्राहकलाई त्यसको असरबाट जोगाउन खोजिरहेका छौं। तर, अहिलेको अवस्था दिगो रहन सक्ने अवस्थामा छैन ।”
विश्वकै सबैभन्दा नाफामुखी कम्पनीहरूमध्ये एक तथा बलियो आपूर्ति शृङ्खला भएको एप्पलसमेत मेमोरी चिपको मूल्यवृद्धिबाट बच्न नसकेको विश्लेषण गरिएको छ । एआई प्रविधिप्रतिको विश्वव्यापी लगानीले उपभोक्ता इलेक्ट्रोनिक्स उद्योगभर लागत बढाएको छ ।
यद्यपि, एप्पलले हालका लागि आइफोन र एयरपड्सको मूल्य भने यथावत् राखेको छ ।
– सीएनएनबाट
