भोटेकोशी र त्रिशूली नदीमा आएको विनाशकारी बाढीका कारण प्रभावित विभिन्न जलविद्युत आयोजनाका सुरुङमा फसेकामध्ये हालसम्म ३ जनाको मात्रै जीवितै उद्धार गरिएको छ । उद्धार गरिएकाहरूमा माथिल्लो त्रिशूली ३ ‘ए’ को सुरुङबाट दुई नेपाली र माथिल्लो त्रिशूली १ को सुरुङबाट एक चिनियाँ नागरिक रहेका छन् ।
स्वतन्त्र ऊर्जा उत्पादकहरूको संस्था (इप्पान) का अनुसार प्रभावित जलविद्युत आयोजनाका सुरुङहरूबाट हालसम्म ४७ वटा शव निकालिएको छ । जसमध्ये उद्धार टोलीले माथिल्लो त्रिशूली १ बाट सोमबारसम्म सबैभन्दा बढी ३९ वटा शव निकालेको छ । त्यस्तै चिलिमेबाट ५, लाङटाङ खोला जलविद्युत आयोजनाबाट २ र माथिल्लो त्रिशूली ३ ‘ए’ बाट १ वटा शव निकालिएको छ ।
बाढीपछि विभिन्न ११ वटा जलविद्युत आयोजनामा कार्यरत ८०५ जना श्रमिक तथा कर्मचारी अझै सम्पर्कविहीन रहेका छन् ।
कुन आयोजनामा कति सम्पर्कविहीन?
- माथिल्लो त्रिशूली १: ४३९ जना
- माथिल्लो त्रिशूली ३ ‘बी’: १७८ जना
- रसुवागढी: ९३ जना
- लाङटाङ: ३९ जना
- माथिल्लो त्रिशूली ३ ‘ए’: ३९ जना
- मैलुङ खोला: ७ जना
- रसुवा भोटेकोशी: ३ जना
- त्रिशूली जलविद्युत आयोजना: ३ जना
- मिडल त्रिशूली गंगा: २ जना
- चिलिमे: १ जना
- देवीघाट जलविद्युत आयोजना: १ जना
बाढी प्रभावित क्षेत्रमा उद्धार तथा खोजी कार्य अधिकांश आयोजनाहरूमा अन्तिम चरणमा पुगेको छ । चिलिमे, लाङटाङ र माथिल्लो त्रिशूली ३ ‘ए’ लगायतका आयोजनाहरूमा सम्भावित ठाउँसम्म खोजी गर्दा थप व्यक्ति फेला नपरेपछि सुरुङभित्रको खोजी कार्य रोकिएको छ । नेपाली सेनाका अनुसार हाल माथिल्लो त्रिशूली १ र माथिल्लो त्रिशूली ३ ‘बी’ मा मात्रै खोजी कार्य जारी राखिएको छ ।
