हर्मुज जलमार्गमा तनाव पुनः चुलिएको छ । इरानको सर्वोच्च राष्ट्रिय सुरक्षा परिषद्ले युद्ध अन्त्य नभएसम्म उक्त जलमार्गमा कडा नियन्त्रण कायम राख्ने घोषणा गरेको छ ।
परिषद्ले अमेरिकी नाकाबन्दीलाई युद्धविरामको स्पष्ट उल्लङ्घन भन्दै आलोचना गरेको छ । केही दिनअघि मात्र इरानले हर्मुज पुनः खुला गरेको घोषणा गरे पनि पछिल्लो अवस्थामा पुनः प्रतिबन्ध कडा बनाइएको छ ।
यसैबीच, डोनाल्ड ट्रम्प ले इरानसँग “सकारात्मक संवाद” भइरहेको दाबी गर्दै जलमार्गका विषयमा अमेरिका ‘ब्ल्याकमेल’ नहुने बताएका छन् ।
युके म्यारिटाइम ट्रेड अपरेसन्सका अनुसार ओमानको तट नजिकै एक तेल ट्यांकर र एक कन्टेनर जहाजमाथि आक्रमण भएको रिपोर्ट गरिएको छ ।
इरानको इस्लामिक रिभोलुसनरी गार्ड कोरका हतियारधारी डुंगाहरूले एक ट्यांकरमा गोली चलाएको जनाइएको छ, यद्यपि चालक दल सुरक्षित रहेको बताइएको छ ।
अर्कोतर्फ, उत्तर–पूर्वी ओमानबाट करिब २५ समुद्री माइल टाढा एक कन्टेनर जहाज अज्ञात क्षेपास्त्रबाट आक्रमणमा परेको छ, जसले केही कन्टेनर क्षतिग्रस्त भएका छन् ।
भारतले पनि घटनाप्रति चिन्ता व्यक्त गरेको छ । दुई भारतीय झण्डा बोकेका जहाज संलग्न ‘गोलीकाण्ड’बारे चिन्ता जनाउँदै इरानलाई भारतीय जहाजहरूको आवागमन सहज बनाउन आग्रह गरेका छन् ।
जलमार्ग क्षेत्रमा जहाज आवागमन उल्लेख्य रूपमा घटेको छ । जहाज ट्र्याकिङ प्रणालीले देखाएअनुसार धेरै जहाजहरू जोखिमका कारण टाढा सरेका छन् ।
यसैबीच, लेबनानमा संयुक्त राष्ट्रसंघीय शान्ति मिसनअन्तर्गत एक फ्रान्सेली सैनिकको मृत्यु भएको छ । इमानुएल म्याक्रोनले उक्त घटनाको पुष्टि गर्दै हिज्बुल्लाह माथि संकेत गरेका छन्, तर हिज्बुल्लाहले संलग्नता अस्वीकार गरेको छ ।
उता इजरायल रक्षा बल ले दक्षिणी लेबनानमा सुरक्षा घेरा कडा पार्दै युद्धविराम उल्लङ्घन गर्ने समूहहरूविरुद्ध कारबाही गरेको जनाएको छ ।
हर्मुज जलमार्ग विश्वकै प्रमुख तेल आपूर्ति मार्गमध्ये एक भएकाले यहाँको अस्थिरताले विश्व अर्थतन्त्रमा गम्भीर प्रभाव पार्न सक्ने विश्लेषकहरू बताउँछन्।
हालको अवस्था अस्पष्ट र तीव्र रूपमा परिवर्तनशील रहेकोले सम्भावित कूटनीतिक सम्झौताको दाबीप्रति पनि शंका उत्पन्न भएको छ।
