राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशन अन्तर्गतको बन्दसत्र व्यवस्थापकीय कमजोरीका कारण आज (सोमबार) स्थगित भएको छ । अब यो सत्र भोलि (मंगलबार) मध्याह्न १२ बजेपछि मात्रै सुरु हुने भएको छ ।
आज साँझ चितवन उद्योग संघको सभाहलमा आयोजित पत्रकार सम्मेलनमा पार्टीका प्रवक्ता मनिष झाले प्राविधिक र व्यवस्थापकीय तयारी नपुगेका कारण बन्दसत्र पूर्वनिर्धारित समयमा हुन नसकेको जानकारी दिएका हुन् ।
“महाधिवेशन प्रतिनिधिहरूको विवरण रुजु गर्ने र परिचयपत्र (कार्ड) प्रिन्ट गर्ने कार्यमा प्राविधिक समस्या उत्पन्न हुँदा आज बन्दसत्र सुरु गर्न सकिएन,” प्रवक्ता झाले पत्रकार सम्मेलनमा भने, “हाम्रो तर्फबाट व्यवस्थापकीय कमजोरी भयो, त्यसका लागि क्षमाप्रार्थी छौँ । भोलि मध्याह्न १२ बजेपछि मात्र बन्दसत्रको कार्यक्रम अगाडि बढ्नेछ ।”
रास्वपाले यसअघि असार ७ गतेदेखि ९ गतेसम्मका लागि महाधिवेशनको मिति तय गरेको थियो । तर, महत्वपूर्ण मानिएको बन्दसत्रको कार्यक्रम एक दिन पर सरेपछि अब महाधिवेशनको समग्र समयावधि पनि थप गरिएको छ ।
सत्र लम्बिएसँगै देशैभरिबाट आएका महाधिवेशन प्रतिनिधिहरूको बसाई र खानपानको अवधि पनि थपिएको छ । यसबाट सिर्जना हुने आर्थिक भार र व्यवस्थापनका विषयमा पार्टीले आवश्यक तयारी गरिसकेको र यसबारे गम्भीरतापूर्वक सोचिएको प्रवक्ता झाले स्पष्ट पारेका छन् ।
चितवनमा जारी यस महाधिवेशनलाई रास्वपाको भावी राजनीतिक दिशा र नेतृत्व चयनका दृष्टिले निकै चासोका साथ हेरिएको छ ।
