देशभरि भएको जेनजी आन्दोलनमा सरकारी दमनका क्रममा २० जनाको ज्यान गएको छ। तीमध्ये मात्र काठमाडौंमा १८ जनाको मृत्यु भएको छ।
राष्ट्रिय ट्रमा सेन्टरमा मात्रै ८ जनाको मृत्यु भएको छ । अस्पताल प्रशासनका अनुसार मृतकमध्ये ५ जनाको पहिचान भइसकेको छ ।
ग्लोबल कलेजमा अध्ययनरत १९ वर्षीय श्रीयाम चौलागाईं, बाँकेका २१ वर्षीय सुलभराज श्रेष्ठ, कीर्तिपुरका ४२ वर्षीय बुद्धि तामाङ, वर्ष नखुलेका गौरव जोशी र स्टप अधिकारीको मृत्यु भएको जनाइएको छ। उनीहरू सबै गम्भीर घाइते अवस्थामा अस्पताल ल्याइएका थिए र उपचारकै क्रममा ज्यान गएको हो । बाँकी तीन जनाको अझै सनाखत हुन सकेको छैन ।
यसैगरी, काठमाडौं मेडिकल कलेजमा मृत्यु भएकामध्ये शौरभ किशोर श्रेष्ठ र सुवास पोखरेलको पहिचान भएको छ । यद्यपि, बाँकी १२ जनाको अझै सनाखत भइसकेको छैन।
काठमाडौंका नयाँ बानेश्वरस्थित सिभिल, एभरेस्ट, सिनामंगलस्थित केएमसी अस्पताल, वीर अस्पताल, ट्रमा सेन्टर, टिचिङ अस्पताल र ललितपुरको पाटन अस्पतालमा घाइतेहरूको उपचार भइरहेको छ ।
यस घटनापछि गृहमन्त्री रमेश लेखकले आफू पदमा नबस्ने घोषणा गरेका छन् । सोमबार साँझ नेपाली कांग्रेसका सभापति शेरबहादुर देउवा निवासमा बसेको पदाधिकारी र पूर्वपदाधिकारीको बैठकमा उनले ठूलो जनधनको क्षतिको जिम्मेवारी लिँदै राजीनामा गर्ने निर्णय गरेका हुन् ।
‘आजको प्रदर्शनमा ठूलो मानवीय क्षति भयो । मैले त्यसको नैतिक जिम्मेवारी लिनुपर्छ, नैतिकताका आधारमा पदमा बस्दिनँ,’ गृहमन्त्री लेखकले भनेको बताइएको छ ।
