लगातार तीन दिनदेखि जारी अविरल वर्षाका कारण देशका विभिन्न भूभागमा बाढी र पहिरोले ठूलो धनजनको क्षति पुर्याएको छ। विशेषगरी नारायणी र सप्तकोशी नदीमा आएको बाढी बस्तीमा पस्दा पश्चिम नवलपरासी र सप्तरीमा गरी ३ सय ८९ भन्दा बढी घर डुबानमा परेका छन्। विपद्का कारण हालसम्म देशभर छ जनाको मृत्यु भएको छ भने सयौँ परिवार विस्थापित भएका छन्।
पश्चिम नवलपरासीको सुस्ता गाउँपालिका–५ मा नारायणी नदीको बाढी बस्तीमा पसेपछि २ सय ७१ भन्दा बढी घर तथा गोठ डुबानमा परेका छन्। कतिपय घरमा तीन फिटसम्म पानी भरिनुका साथै स्थानीय सशस्त्र प्रहरी बलको ब्यारेक समेत डुबेको छ। झोलुंगे पुलसम्म पुग्ने कच्ची सडक नदीले डुबाएपछि स्थानीय तहमा आवतजावतका लागि डुंगाको सहारा लिनुपर्ने बाध्यता बनेको छ। नेपाल प्रहरी, नेपाली सेना र सशस्त्र प्रहरीको टोलीले डुंगामार्फत सुस्ताका १ सय ७२ परिवारका ४ सय जनालाई गाउँकै अग्लो स्थानमा रहेका तीन वटा होल्डिङ सेन्टरमा सारेको छ। धेरै स्थानीय घर, अन्नपात र चौपायाको मायाले गाउँ छाडेर अन्यत्र जान नमानिरहेको अवस्थामा सुरक्षाकर्मीले बालबालिका र वृद्धवृद्धालाई प्राथमिकतामा राखेर उद्धार गरिरहेका छन्। जोखिम बढ्दै गएपछि गण्डक ब्यारेजका सबै ३६ वटै ढोका खोलिएका छन्। सुस्ताका जनप्रतिनिधिहरूले वर्षौंदेखिको यो समस्या समाधानका लागि स्थायी तटबन्ध निर्माणमा सरकारले ध्यान नदिएको गुनासो गरेका छन्।
उता सप्तरीको तिलाठी कोइलाडी गाउँपालिका र हनुमाननगर कंकालिनी नगरपालिकामा गरी १५७ भन्दा बढी घर डुबानमा परेका छन्। सप्तकोशीको बाढी बस्तीमा पसेपछि विस्थापित परिवारलाई कोशीको पश्चिमी तटबन्धमा त्रिपाल टाँगेर राखिएको छ। बाढीका कारण आहारा र आवासको समस्या भएपछि सम्बन्धित पालिकाहरूले प्रभावित क्षेत्रमा म्यास सञ्चालन गरी खानपिन तथा राहत सामग्रीको व्यवस्थापन मिलाएका छन्। बाढीकै कारण गोर्बरगाढाका एक ५ वर्षीय बालकको डुबेर मृत्यु भएको छ।
विपद्को असर देशका अन्य भागमा पनि उत्तिकै परेको छ। पाल्पाको रिब्दीकोटमा पहिरोले घर पुरिँदा एक महिलाको मृत्यु भएको छ भने सिद्धबाबा क्षेत्रको सडक अवरुद्ध भएको छ। अर्घाखाँचीको भुजुंगेमा जमिन भासिन थालेपछि २१ परिवारका ७१ जनालाई बहुउद्देश्यीय भवनमा स्थानान्तरण गरिएको छ। बर्दियाको गुलरियामा सर्जु नदीको सतह बढ्दा २० भन्दा बढी घर डुबानमा परेका छन् भने चितवनको नगरवन टापुमा फसेका एक व्यक्तिलाई प्रहरीले उद्धार गरेको छ।
मर्स्याङ्दी नदीमा गेग्रान र बालुवा बढेकाले मध्य–मर्स्याङ्दी र माथिल्लो मर्स्याङ्दी ‘ए’ जलविद्युत् आयोजनाहरूले उत्पादन बन्द गरी ‘सर्ट डाउन’ गरेर बाँध फ्लसिङ गरेका छन्। महाकाली नदीमा पानीको बहाव १ लाख क्युसेक नाघेकाले शारदा ब्यारेजमा ठूला सवारीसाधनको आवतजावत रोकिएको छ। पहाडी तथा हिमाली जिल्लाहरू जाजरकोट, कालीकोट, हुम्ला, जुम्ला र मुगुका मुख्य राजमार्ग तथा भित्री सडकखण्डहरू पहिरोका कारण अवरुद्ध भएका छन्। मौसममा केही सुधार आएसँगै खोटाङमा बन्द यातायात सुचारु गर्ने तयारी गरिएको छ भने सुरक्षा निकायहरूलाई देशभर उच्च सतर्कतामा राखिएको छ।
