प्रसिद्ध नेपाली पर्वतारोही कामीरिता शेर्पाले ३१औँ पटक सगरमाथाको सफल आरोहण गरी विश्वकै सर्वोच्च शिखरमा सर्वाधिक पटक पुगेको आफ्नै कीर्तिमान तोडेका छन् ।
५५ वर्षीय शेर्पा मंगलबार बिहान भारतीय सेनाको आरोहण टोलीसँग सगरमाथाको चुचुरोमा पुगेका हुन् । सोलुखुम्बुको थामे गाउँका कामीरिता सन् १९९४ मा पहिलो पटक सगरमाथा चढेका थिए ।
‘एभरेस्ट म्यान’ भनेर चिनिने उनी हाल ‘फोर्टिनपीक एक्सपिडिसन’ नामक आरोहण कम्पनीसँग आबद्ध छन् । कम्पनीका प्रमुख टासीलाक्पा शेर्पाका अनुसार कामीरिता हाललाई अवकाशको मनस्थितिमा छैनन् र स्वास्थ्यले साथ दिँदासम्म आरोहण जारी राख्ने सोचमा छन् ।
कामीरितासँग प्रतिस्पर्धामा रहेका पाङ्बोचेका पासाङ दावा शेर्पाले पनि यस वर्ष २९औँ पटक सगरमाथा आरोहण गरिसकेका छन् ।
कामीरिता शेर्पा हालैका वर्षहरूमा प्रत्येक सिजनमा कम्तीमा एकपटक सगरमाथा चढ्दै आफ्नै कीर्तिमान अद्यावधिक गरिरहेका छन् । सन् २०२० को कोभिड महामारी बाहेक उनले प्रत्येक वर्ष सगरमाथा आरोहण गरेका छन् ।
