नेपाली कांग्रेसका सभापति गगन थापाले आगामी पाँच वर्षभित्र नेपाललाई सूचना प्रविधिको अन्तर्राष्ट्रिय केन्द्र (डिजिटल हब) बनाउने लक्ष्यसहितको महत्त्वाकांक्षी योजना अघि सारेका छन् ।
सोमबार एक भिडियो सन्देश जारी गर्दै उनले सूचना प्रविधि क्षेत्रलाई अर्थतन्त्रको मेरुदण्ड बनाउने गरी चार प्रमुख योजनाहरू सार्वजनिक गरेका हुन् । यसअघि आफूले कीर्तिपुरको एउटा राजनीतिक सभामा ल्यापटप चलाएर महिनाको लाखौँ कमाउन सकिने भनी दिएको अभिव्यक्तिलाई ट्रोल गरिए पनि त्यो कुनै उडन्ते सपना नभई स्पष्ट खाकासहितको योजना भएको उनले पुन: दोहोर्याएका छन् ।
सभापति थापाले अघिल्ला सरकारहरूले गरेका केही कानुनी सुधारका कारण सूचना प्रविधि क्षेत्रमा सकारात्मक संकेत देखिएको उल्लेख गर्दै अब त्यसलाई थप गति दिनुपर्नेमा जोड दिए । सन् २०२४ देखि २०३४ सम्मलाई ‘आइटी दशक’ को रूपमा अघि बढाउँदै १० वर्षमा ३० खर्ब बराबरको सेवा निर्यात गर्ने र ५ लाख प्रत्यक्ष रोजगारी सिर्जना गर्ने लक्ष्य प्राप्त गर्न सकिने उनको दाबी छ। थापाका अनुसार प्रतिबद्ध भएर काम गरेमा पाँच वर्षभित्रै ४ खर्ब बराबरको आईटी निर्यात, २ लाख प्रत्यक्ष रोजगारी र कम्तीमा ५ वटा नेपाली आईटी कम्पनीलाई धितोपत्र बजारमा सूचीकृत गर्न सम्भव छ।
आफ्नो कार्ययोजना स्पष्ट पार्दै थापाले पहिलो प्राथमिकतामा ‘स्थिर कर नीति’ लाई राखेका छन् । नीतिगत स्थिरताले मात्र यो क्षेत्र फस्टाउन सक्ने उनको तर्क छ। दोस्रो योजनामा मानव संशाधन विकासलाई जोड्दै उनले वर्षेनी उत्पादन हुने १५ हजार स्नातक र बजारको मागबीच रहेको खाडल पुर्न सरकारी र निजी क्षेत्रको सहकार्यमा दक्ष जनशक्ति उत्पादन गर्नुपर्ने बताए । उनका अनुसार पहिले ट्यालेन्ट (जनशक्ति) तयार भएपछि उद्योगहरू आफैँ आकर्षित हुनेछन् ।
तेस्रो योजना अन्तर्गत नेपालले अब फ्रिल्यान्सिङ र बीपीओमा मात्र सीमित नभई आफ्नै ‘डिजिटल प्रोडक्ट’ विकास गर्नुपर्नेमा उनले जोड दिएका छन् । यसका लागि स्टिम शिक्षा, अनुसन्धान र विकासमा १० प्रतिशत कर छुट तथा भारतको सफ्टवेयर टेक्नोलोजी पार्कको मोडलमा एकीकृत डिजिटल इकोसिस्टम निर्माण गर्नुपर्ने उनको प्रस्ताव छ । साथै, दुई लाखभन्दा बढी ‘गिग वर्कर’ हरूलाई श्रम ऐन संशोधनमार्फत सामाजिक सुरक्षामा आबद्ध गराउने योजना पनि उनले अघि सारेका छन् ।
चौथो महत्वपूर्ण बुँदामा थापाले नेपालको हरित ऊर्जा (जलविद्युत) लाई प्रयोग गरी ‘ग्रीन डाटा सेन्टर’, एआई, र ब्लकचेन जस्ता बढी ऊर्जा खपत हुने सेवाहरूमा विश्व बजारसँग प्रतिस्पर्धा गर्नुपर्ने उल्लेख गरे । पुराना र साँघुरा कानुनहरूलाई परिमार्जन गर्दै नेपाली कम्पनीहरूलाई विदेशमा लगानी गर्न सहज बनाउने र वैदेशिक लगानीको सीमा हटाएर स्वचालित प्रणाली लागू गर्ने जस्ता सुधारलाई निरन्तरता दिँदै नेपाललाई डिजिटल युगमा लैजान कांग्रेस प्रतिबद्ध रहेको सभापति थापाले बताएका छन् ।
