देशको मुख्य जीवनरेखा मानिने पृथ्वी राजमार्गअन्तर्गत कृष्णभीरमा ठूलो पहिरो गएपछि राजमार्ग पूर्ण रूपमा अवरुद्ध भएको छ। यसअघि भदौ १० गते आएको बाढीका कारण अवरुद्ध भई भर्खरै सञ्चालनमा आएको राजमार्ग २४ घण्टा पनि नबित्दै आइतबार पुनः पहिरो जाँदा काठमाडौँ–पोखरा आवातजावत ठप्प भएको छ।
बागमती प्रदेश ट्राफिक प्रहरी कार्यालयका अनुसार मुग्लिनबाट पोखरातर्फको खण्डमा अवरोध नरहे पनि मुग्लिन कट्नेबित्तिकै कृष्णभीरमा गएको पहिरोले सडक पूर्ण रूपमा बन्द गराएको हो। मुख्य मार्ग अवरुद्ध भएपछि यात्रु र यातायात व्यवसायी वैकल्पिक मार्गको खोजी तथा प्रयोगमा जुटेका छन्।
वैकल्पिक मार्ग र यातायात व्यवसायीको गुनासो
सडक अवरुद्ध भएपछि सरकारले तोकेको वैकल्पिक बाटोमार्फत सवारीसाधनहरू सञ्चालन भइरहेका छन्। नेपाल यातायात व्यवसायी राष्ट्रिय महासंघका अध्यक्ष सरोज सिटौलाका अनुसार पोखराबाट काठमाडौँ आवतजावत गर्न मुग्लिनबाट चितवन, हेटौँडा हुँदै बाइरोडको बाटो प्रयोग गरिएको छ भने १४ सिटे साना गाडीहरूलाई दक्षिणकाली–हेटौँडा रुटबाट चल्ने अनुमति दिइएको छ।
तर, सरकारले तोकेको वैकल्पिक बाटो अति घुमाउरो हुँदा अत्यधिक जाम हुने समस्या बढेको व्यवसायीहरूको भनाइ छ। उनीहरूले विकल्पका रूपमा मध्यपहाडी लोकमार्ग पनि प्रयोग गर्न दिनुपर्ने माग गरे पनि सरकारबाट हालसम्म त्यस्तो अनुमति नआएको अध्यक्ष सिटौलाले बताए।
सडक तत्काल सञ्चालनमा ल्याउन असम्भव
कृष्णभीरको क्षतिग्रस्त सडक तत्काल पन्छाएर खुलाउन सकिने अवस्था नरहेको नागढुंगा–मुग्लिन सडक आयोजना (पश्चिम खण्ड) का अधिकारीहरूले बताएका छन्। त्रिशूली नदीले सडकको फेदमा निरन्तर कटान गरिरहेका कारण सडकको करिब १०० मिटर भाग भासिएको र चिरिएको छ। अवस्था जोखिमपूर्ण बनेपछि यस खण्डमा पैदलयात्रासमेत पूर्ण रूपमा रोकिएको छ।
पश्चिम खण्डका प्रमुख तथा डिभिजनल इन्जिनियर सजना अधिकारीका अनुसार खोलाले सडकको फेद काटिरहेका कारण कति भाग झर्छ यकिन गर्न सकिने अवस्था छैन। सडकको भित्तोसमेत चर्किएको र माथिल्लो डाँडामा बस्ती रहेका कारण भित्तो काटेर बाटो बनाउन पनि असम्भव छ। वर्तमान जटिल परिस्थितिमा कसरी अघि बढ्ने भन्ने बारेमा विषय विज्ञहरूले विस्तृत प्राविधिक अध्ययन गरिरहेको आयोजनाका सूचना अधिकारी इन्जिनियर सचेन्द्र मिश्रले जानकारी दिएका छन्।
