अमेरिकी मध्यावधि निर्वाचनमा सत्तारूढ रिपब्लिकन पार्टीले व्यहोरेको ऐतिहासिक हारपछि राष्ट्रपति डोनाल्ड ट्रम्पले आफ्ना प्रमुख सल्लाहकार तथा कडा साउन्ड-इमिग्रेसन (अध्यागमन) नीतिका मुख्य योजनाकार स्टेफन मिलरलाई नयाँ ह्वाइट हाउस ‘चीफ अफ स्टाफ’ (मुख्य सचिव) मा नियुक्त गरेका छन् ।
दुवै सदन (सेनेट र हाउस अफ रिप्रिजेन्टेटिभ्स) मा कंग्रेसको नियन्त्रण डेमोक्र्याटहरूले खोसेपछि ट्रम्प प्रशासनको आगामी दुई वर्षको एजेन्डामा ठूलो धक्का लागेको छ। उक्त पराजयलगत्तै वर्तमान चीफ अफ स्टाफ सुजी वाइल्सले राजीनामा दिएकी हुन्।
पत्रकारहरूसँग कुरा गर्दै राष्ट्रपति ट्रम्पले वाइल्सले धेरै राम्रो काम गरेको भए पनि “कहिलेकाहीँ परिवर्तन र नयाँ कदमहरू चाल्नुपर्ने हुन्छ” भन्दै मिलरलाई नियुक्त गरेको पुष्टि गरे। प्रथम कार्यकालदेखि नै ट्रम्पका अति विश्वासपात्र रहँदै आएका ४१ वर्षीय मिलर हाल उप-चीफ अफ स्टाफका रूपमा कार्यरत छन्। उनले सोमबारदेखि नयाँ जिम्मेवारी सम्हाल्दै छन्।
नियुक्तिपछि सामाजिक सञ्जाल ‘एक्स’ (X) मा लेख्दै मिलरले ट्रम्पलाई “अमेरिकी इतिहासका सबैभन्दा परिवर्तनकारी राजनीतिक नेता” को संज्ञा दिएका छन्। उनले वाइल्सलाई उहाँको दीर्घकालीन सेवा र मित्रताका लागि धन्यवाद दिँदै आफ्नो मुख्य लक्ष्य राष्ट्रपतिलाई पूर्ण रूपमा सहयोग गर्नु र गणतन्त्रको रक्षा गर्नु रहेको बताए।
मध्यावधि चुनावमा पराजय व्यहोरेपछि ह्वाइट हाउस छाड्ने वाइल्स एक्ली अधिकारी होइनन्। उनीसँगै न्याय मन्त्रालयका (DOJ) नागरिक अधिकार महाशाखा प्रमुख हरमीत ढिल्लोन, राष्ट्रिय सुरक्षा महाशाखा प्रमुख जोन आइजनबर्ग र फ्लोरिडाका अमेरिकी सरकारी वकिल जेसन रेडिङ क्विनोनेसले पनि पदबाट राजीनामा दिएका छन्।
अर्कोतर्फ, डेमोक्र्याटिक पार्टीका नेताहरूले भने मिलरको नियुक्तिलाई लिएर ट्रम्पको कडा आलोचना गरेका छन्। नवनिर्वाचित हाउस ओभरसाइट कमिटीका प्रमुख रोबर्ट गार्सीयाले मिलरले अघि बढाएका असंवैधानिक अध्यागमन छापा र कडा नीतिहरूको छानबिन जारी राख्ने बताएका छन्। त्यस्तै, डेमोक्र्याटिक नेता हाकिम जेफ्रिजले मिलरलाई “खतरनाक र उग्रवादी” भन्दै उनको नियुक्तिप्रति तीव्र असन्तोष व्यक्त गरेका छन्।
यद्यपि, ह्वाइट हाउसका सञ्चार निर्देशक स्टिफन चिउङले मिलरको बचाउ गर्दै उनी ट्रम्पको एजेन्डाका सबैभन्दा ठूला समर्थक भएको र बाँकी कार्यकालमा महत्वपूर्ण उपलब्धि हासिल गर्न मद्दत पुग्ने बताएका छन्।
