नेपालको सोलुखुम्बुको सानो गाउँबाट अमेरिका पुगेकी डोल्मा शेर्पाले अमेरिकाको प्रतिष्ठित न्यूयोर्क ल स्कुलबाट कानुन विषयमा डाक्टरेट (जुरिस डाक्टर) उपाधि हासिल गरेकी छन् ।
उनले सन् २०२६ को दीक्षान्त समारोहमा सम्पूर्ण स्नातकहरूको प्रतिनिधित्व गर्दै प्रेरणादायी सम्बोधन गरेपछि उनको कथा विश्वभरका नेपालीहरूका लागि गर्वको विषय बनेको छ ।
डोल्माले सन् २०१६ मा उच्च शिक्षाका लागि अमेरिका आएकी थिइन् । उनका बुबा पर्यटन मार्गदर्शक तथा पर्वतारोही थिए भने आमा गृहिणी । सीमित आम्दानी हुँदाहुँदै पनि छोरीको सपना पूरा गर्न आमाबुवाले आफ्नो वृद्धावस्थाको बचतसमेत जोखिममा राखेका थिए । यही त्यागले आफूलाई सफल हुन थप प्रेरणा दिएको उनले बताइन् ।
नेपालबाट प्राप्त तीनवर्षे स्नातक डिग्री अमेरिकामा पूर्ण रूपमा मान्यता नपाएपछि उनले पुनः स्नातक अध्ययन गर्नुपर्यो । त्यसपछि कानुन अध्ययन प्रवेश परीक्षा उत्तीर्ण गरी न्यूयोर्क ल स्कुलमा पूर्ण छात्रवृत्तिमा अध्ययन गरिन् ।
दीक्षान्त समारोहमा डोल्माले आफ्नी आमाको परम्परागत पोशाक लगाएर उपस्थित भइन् । उनले आफ्नी आमा टाम्गीको सम्मानमा यस्तो गरेको बताइन् । उनकी आमाले छोरी भएकै कारण विद्यालय जान पाइनन् र आफ्नै नामसमेत लेख्न सकिनन् । डोल्माले भावुक हुँदै भनिन्, “आजदेखि मेरी आमाको शिक्षाबारे कसैले सोध्यो भने म गर्वका साथ ‘डाक्टर’ भन्नेछु ।”
उनले न्यूयोर्क राज्यको बार परीक्षा पनि सफलतापूर्वक उत्तीर्ण गरिसकेकी छन् र अब विश्वकै अग्रणी आप्रवासन कानुन फर्म फ्रागोमेनमा कानुनी व्यवसाय सुरु गर्ने भएकी छन् ।
सम्बोधनका क्रममा डोल्माले कानुनी शिक्षा व्यक्तिगत उपलब्धि मात्र नभई समाजका वञ्चित र अवसरबाट टाढा रहेका मानिसहरूको सेवामा प्रयोग गर्नुपर्ने जिम्मेवारी भएको बताइन् ।
उनको संघर्ष, दृढता र सफलताको कथा अहिले विश्वभरका नेपाली समुदायका लागि प्रेरणाको स्रोत बनेको छ ।
बधाई छ, डोल्मा!
