९ फाल्गुन २०८०, बुधबार | Wed Feb 21 2024

त्रिवि उपकुलपतिमा सर्टलिष्टमा परेका विवादित व्यक्तिहरुबारे पुनर्विचार गर्न आदेश



प्रतिनिधिसभाको शिक्षा, स्वास्थ्य तथा सूचना प्रविधि समितिले त्रिभुवन विश्वविद्यालयको उपकुलपति छनोट गर्दा विवादित व्यक्तिबारे पुनर्विचार गर्न प्रधानमन्त्री र शिक्षामन्त्रीलाई निर्देशन दिएको छ ।

उपकुलपति छनोटका लागि शिक्षा, विज्ञान तथा प्रविधि मन्त्री अशोककुमार राई नेतृत्वमा गठित सिफारिस समितिले ४३ जनामध्ये १४ जनाको नाम सर्टलिस्ट गरेको थियो । तर सर्टलिस्टमा परेकामध्ये बौद्धिक चोरीको आरोप लागेका पूर्वउपकुलपति तीर्थ खनिया, भ्रष्टाचार मुद्दामा मुछिएका पोखरा विश्वविद्यालका पूर्वउपकुलपति केशरजंग बराल र त्रिविका हालका निमित्त उपकुलपति शिवलाल भुसालको नाममा पुनर्विचार गर्न समितिले निर्देशन दिएको हो । भुसाललाई भने सूचना लुकाएको आरोपमा राष्ट्रिय सूचना आयोगले जरिवाना तिराएको थियो ।

अल्पसुचीमा परेकामध्ये केही बौद्धिक चोरीमा परेका, भ्रष्टाचारमा मुछिएका र सूचना लुकाएका व्यक्तिहरुलाई सुचीबाट आउट गर्ने शब्द कत्तिको ठीक हुन्छ यस्तो व्यक्तिलाई विशेष ध्यान दिन शिक्षा मन्त्रालय, प्रधानमन्त्रीलाई ध्यानाकर्षण गराउने समितिका सभापति भानुभक्त जोशीले भनेका छन् ।

समितिको बैठकले कार्यबाहक उपकुलपति भुसालले मनोमानी रुपमा गरेको नियुक्ति र सरुवाको विषयमा कानुन सम्भव भए नभएको छानबिन गर्न पनि शिक्षा मन्त्रालयलाई निर्देशन दिएको छ ।

प्रकाशित मिति : २९ माघ २०८०, सोमबार  ४ : ३३ बजे