सहकारी ठगीको अभियोग लागेकी सार्वजनिक लेखा समितिका सभापति ऋषिकेश पोखरेलकी पत्नी अञ्जला कोइरालासँग उच्च अदालत विराटनगरले एक करोड रुपैयाँ धरौटी माग्ने आदेश दिएको छ ।
मोरङको धनपालथानस्थित उमागौरी सहकारी प्रकरणमा संलग्न भएको अभियोगमा यसअघि जिल्ला अदालत मोरङले कोइरालालाई १० लाख धरौटीमा रिहा गर्ने आदेश दिएको थियो । सो आदेशविरुद्ध दायर पुनर्विचार निवेदनमा बिहीबार उच्च अदालतले नयाँ आदेश जारी गरेको हो ।
वैशाख ११ गते उच्च अदालतका न्यायाधीश श्रीधराकुमारी पुडासैनी र केशवप्रसाद बास्तोलाको संयुक्त इजलासमा राय फरक परेपछि, तेस्रो न्यायाधीश विष्णुप्रसाद अर्यालको इजलासमा मुद्दा पुगेको थियो । अर्यालले दुबै न्यायाधीशको आधा-आधा राय स्वीकार गर्दै आदेश जारी गरेका हुन् ।
यसअन्तर्गत अञ्जला कोइरालासहित प्रतिवादी रोशन राजवंशी, ज्योति बास्कोटा र सन्तलाल खवासलाई एक–एक करोड धरौटीमा रिहा गर्न आदेश भएको छ । यसअघि जिल्ला अदालतले अञ्जलासँग १० लाख, राजवंशीलाई थुनामा पठाउने, र बास्कोटा तथा खवाससँग ५–५ लाख धरौटी माग्ने आदेश गरेको थियो ।
तर लक्ष्मी कार्की, सुमन लोहनी र मनोज सोनुको हकमा भने जिल्ला अदालतकै आदेश सदर गरिएको छ । कार्कीलाई ५० हजार, लोहनीलाई २ लाख र सोनुलाई १ लाख धरौटीमा रिहा गर्ने आदेश यथावत राखिएको छ ।
मोरङ धनपालथान–४ मा रहेको उमागौरी कृषि सहकारी संस्थाको करिब २२ करोड ४८ लाख रुपैयाँ अपचलन गरेको आरोपमा अञ्जलासहित २६ जनाविरुद्ध मुद्दा दायर गरिएको हो । उनी तत्कालीन सञ्चालक समितिकी सदस्य थिइन् ।
सरकारी वकिलको कार्यालय मोरङले २०८१ मंसिर २७ गते सहकारीका अध्यक्ष शम्भु रौनियारसहित २६ जनाविरुद्ध बिगोबमोजिम जरिवाना र ६ देखि ८ वर्षसम्मको कैद सजाय माग गर्दै अभियोगपत्र दायर गरेको थियो ।
अभियोगपत्र दायर गर्दा प्रतिवादी रोशन राजवंशी मात्र अदालतमा पेस भएका थिए भने अन्य प्रतिवादी पछि उपस्थित भएका थिए । अझै धेरैजना प्रतिवादी फरार रहेको प्रहरीले जनाएको छ ।
