काठमाडौं । प्रधानमन्त्री बालेन्द्र (बालेन) शाह र राष्ट्रिय स्वतन्त्र पार्टी (रास्वपा)का सभापति रवि लामिछानेबीच आइतबार करिब चार घण्टा लामो भेटवार्ता भएको दाबी गरिएको छ। बैठकमा सरकारका कामकारबाही, पार्टी व्यवस्थापन, सामाजिक असन्तोष र परराष्ट्र चासोसहित विभिन्न विषयमा छलफल भएको बताइएको छ।
बैठकबारे सार्वजनिक रूपमा कुनै आधिकारिक विवरण जारी नगरिए पनि रास्वपाका उच्च स्रोतलाई उद्धृत गर्दै विभिन्न सञ्चारमाध्यमहरूले पाँच प्रमुख विषयमा लामिछानेले प्रधानमन्त्रीसँग चासो राखेको उल्लेख गरेका छन्।
स्रोतका अनुसार पहिलो विषय सुकुमवासी समस्यासँग सम्बन्धित थियो। लामिछानेले समस्या समाधानमा भइरहेको ढिलाइबारे जिज्ञासा राख्दै सरकारको आगामी योजनाबारे जानकारी मागेका थिए। जवाफमा प्रधानमन्त्री शाहले समस्या समाधानको प्रक्रिया अघि बढिरहेको भए पनि कर्मचारीतन्त्र र स्थानीय तहबाट अपेक्षित सहयोग नपाएको बताएका बताइएको छ।
दोस्रो विषय अर्थमन्त्री डा. स्वर्णिम वाग्ले र प्रधानमन्त्रीबीच देखिएको भनिएको मतभेदसँग सम्बन्धित थियो। बजेट निर्माण र करसम्बन्धी केही निर्णयलाई लिएर उत्पन्न असन्तुष्टिबारे दुवै नेताबीच छलफल भएको स्रोतको दाबी छ। पछिल्ला केही सरकारी बैठकमा अर्थमन्त्रीको अनुपस्थितिलाई पनि यही सन्दर्भसँग जोडेर चर्चा गरिएको बताइएको छ।
तेस्रो विषय रास्वपाको संगठनात्मक व्यवस्थापन थियो। पार्टीको महामन्त्री पदमा भूपदेव शाहको मनोनयनबारे देखिएको अन्योलका विषयमा पनि छलफल भएको बताइएको छ। प्रधानमन्त्रीले पार्टीको आन्तरिक निर्णय प्रक्रियामा आफूलाई धेरै नतान्न आग्रह गरेको र नेतृत्वले छिट्टै निर्णयमा पुग्ने समझदारी गरेको स्रोतले जनाएको छ।
बैठकमा सामाजिक सञ्जालमा बढ्दो असन्तुष्टि सडक आन्दोलनतर्फ जान थालेको अवस्थाबारे पनि छलफल भएको बताइएको छ। सुकुमवासी समस्या, आत्मदाहजस्ता घटनाले बढाएको जनअसन्तोषलाई सम्बोधन गर्न आवश्यक रहेको भन्दै लामिछानेले सरकारलाई सक्रिय हुन सुझाव दिएका थिए। प्रधानमन्त्रीले भने सरकारविरुद्ध नियोजित प्रचार भइरहेको दाबी गर्दै सुशासन र जनगुनासो सम्बोधनमा सरकार प्रतिबद्ध रहेको बताएका बताइएको छ।
पाँचौं विषय परराष्ट्र र भूराजनीतिक चासोसँग सम्बन्धित थियो। दलाई लामाको जन्मजयन्तीका अवसरमा भएका कार्यक्रमलाई लिएर उत्पन्न कूटनीतिक चर्चा तथा त्यससँग जोडिएका विषयमा पनि छलफल भएको स्रोतको भनाइ छ। प्रधानमन्त्रीले नेपालको स्थापित परराष्ट्र नीतिमा कुनै परिवर्तन नभएको र भ्रम फैलाउने प्रयास भइरहेको धारणा राखेको बताइएको छ।
स्रोतका अनुसार प्रधानमन्त्री शाहले पनि सभापति लामिछानेसमक्ष तीन प्रमुख सरोकार राखेका थिए। पहिलो, रास्वपाका केही सांसद तथा नेताले सरकारविरुद्ध सार्वजनिक रूपमा दिएको अभिव्यक्तिप्रति असन्तुष्टि जनाउँदै पार्टीभित्र अनुशासन कायम गर्न आग्रह गरेका थिए।
दोस्रो, संसद्मा प्रधानमन्त्रीको उपस्थितिलाई लिएर आफ्नै दलका सांसदहरूले प्रश्न उठाएको विषयमा पनि उनले असन्तुष्टि व्यक्त गरेका बताइएको छ। उनले आफ्नो कार्यशैली र संसदीय अभ्यासबीच सन्तुलन कायम गर्न पार्टी नेतृत्वको सहयोग आवश्यक रहेको धारणा राखेको स्रोतले जनाएको छ।
तेस्रो, सुशासनका कार्यक्रम कार्यान्वयनका क्रममा विभिन्न अवरोध सामना गर्नुपरेको भन्दै त्यसलाई पार गर्न पार्टी नेतृत्वको साथ आवश्यक रहेको प्रधानमन्त्रीले बताएका बताइएको छ।
बैठकमा प्रधानमन्त्रीका मुख्य सल्लाहकार कुमार बेन, रास्वपा सभापति लामिछानेका स्वकीय सचिव अविनाश आचार्यलगायत सहभागी रहेको दाबी गरिएको छ।
यद्यपि, प्रधानमन्त्रीको सचिवालय वा रास्वपाले बैठकका एजेन्डा र निष्कर्षबारे हालसम्म कुनै आधिकारिक जानकारी सार्वजनिक गरेका छैनन्।
