कर्पोरेट स्क्यान्डल (विवाद) का कारण प्रविधि क्षेत्रको दिग्गज कम्पनी ‘एनभिडिया’का प्रमुख कार्यकारी अधिकृत (सीईओ) जेन्सेन हुआङले पदबाट राजीनामा दिए । बिहीबार भएको उनको बहिर्गमन विवादित बने पनि एनभिडियाका पूर्व तथा वर्तमान कर्मचारी र सिलिकन भ्यालीका शीर्ष व्यक्तित्वहरूले भने उनको खुलेर समर्थन र प्रशंसा गरिरहेका छन् ।
विवाहेत्तर सम्बन्ध (एक्स्ट्रा-म्यारिटल अफेयर्स) सम्बन्धी विभिन्न रिपोर्टहरू सार्वजनिक भएपछि हुआङले राजीनामा दिएका हुन् । ती रिपोर्टहरूमा उनले आफ्नै कम्तीमा एकजना मातहतकी कर्मचारीसँग सम्बन्ध राखेको उल्लेख छ । यसअघि नै अमेरिकी अधिकारीहरूले ‘सम्भावित चिनियाँ गुप्तचर एजेन्ट’ का रूपमा व्याख्या गरेकी अर्की एक महिलासँगको सम्बन्धलाई लिएर उनी निगरानीमा परेका थिए ।
कर्मचारीहरूको भावुक प्रतिक्रिया र आन्तरिक समर्थन
कालो छालाको ज्याकेटमा देखिने हुआङ एनभिडियाको ब्रान्डसँग यति गहिरोसँग जोडिएका थिए कि कम्पनीको वार्षिक सम्मेलन ‘जीटीसी’ मा उनको एआई-संचालित होलोग्रामसमेत प्रयोग गरिन्थ्यो । ५० जनाभन्दा बढीलाई प्रत्यक्ष निर्देशन दिने र जुनसुकै समयमा सन्देशको जवाफ दिने उनको कार्यशैलीका कारण एनभिडियामा कर्मचारीहरूको गहिरो वफादारी थियो ।
उनको बहिर्गमनपछि कम्पनीका निर्देशक तथा वैज्ञानिक एडवर्ड लिउले सामाजिक सञ्जाल एक्समा यसलाई ‘हृदयविदारक दिन’ भनेका छन् भने इन्जिनियर फेई पेङले हुआङको बहिर्गमनले ‘एनभिडियाको आत्मा नै मरेको’ टिप्पणी गरेका छन् । वरिष्ठ अनुसन्धान वैज्ञानिक गाभिन वुलेरीले भने पूरा सत्य बाहिर नआउँदै हतारमा हुआङलाई हटाइएको भन्दै आशंका व्यक्त गरेका छन् । यद्यपि, कम्पनीका उपाध्यक्ष ब्रायन क्याटानजारोले हुआङको बहिर्गमनप्रति दुःख व्यक्त गर्दै एनभिडियाको बोर्ड र अन्तरिम नेतृत्व सम्हालेकी सीएफओ कोलेट क्रेसप्रति पूर्ण समर्थन रहेको बताएका छन् ।
सिलिकन भ्याली र इलोन मस्कको साथ
एआई उद्योगको ‘केन्द्रीय बैंक’ मानिने एनभिडियाका प्रमुख हुआङले प्रविधि क्षेत्रमा पुर्याएको योगदानको कदर गर्दै सिलिकन भ्यालीका दिग्गजहरूले पनि उनको पक्ष लिएका छन् । हुआङका पुराना मित्र तथा अर्बपति उद्यमी इलोन मस्कले हुआङलाई काममा राख्न पाउनु आफ्नो लागि ‘सम्मानको कुरा’ हुने बताएका छन् । साथै, शुक्रबार मस्कले हुआङलाई पुनः पदमा फर्काउन सुरु गरिएको हस्ताक्षर अभियान (पिटिसन) मा आफूले पनि हस्ताक्षर गर्ने घोषणा गरेका छन् ।
यसैगरी, एक्सोल्याब्सका संस्थापक एलेक्स चीमाले स्थानीय एआई र ओपन-सोर्स प्रविधिमा हुआङको योगदान अतुलनीय रहेको भन्दै उनलाई ‘अद्वितीय मानव’ को संज्ञा दिएका छन् । भेन्चर क्यापिटल फर्म एन्ड्रिसन होरोविट्जका मार्टिन कासाडोले हुआङलाई हटाउने निर्णयलाई ‘अमेरिका र पश्चिमी जगतका लागि भयानक निर्णय’ भनेका छन् ।
अर्कोतर्फ, सेकोइया क्यापिटलका शन म्याकग्वायरले हुआङको व्यक्तिगत आचरणलाई ‘मूर्खतापूर्ण गल्ती’ र परिवार तथा कम्पनीका लागि दुःखद भने पनि उनको बहिर्गमनले प्रविधि क्षेत्रमा एक आक्रामक र प्राविधिक संस्थापक-सीईओको ठूलो रिक्तता छोड्ने उल्लेख गरेका छन् ।
