नेपाल सरकार, संस्कृति, पर्यटन तथा नागरिक उड्डयन मन्त्रालय अन्तर्गतको पर्यटन विभागले सन् २०२६ को वसन्त ऋतुका लागि हिमाल आरोहण अनुमति सम्बन्धी पछिल्लो प्रतिवेदन सार्वजनिक गरेको छ । ्
मे ८, २०२६ सम्मको तथ्याङ्क अनुसार यस सिजनमा ३० वटा विभिन्न हिमाल आरोहणका लागि जम्मा १,१३४ जना आरोहीहरूले अनुमति लिएका छन् ।
सगरमाथामा उच्च चापविश्वको सर्वोच्च शिखर सगरमाथा (८८४८.८६ मि.) आरोहणका लागि यस वर्ष ५० वटा टिमबाट जम्मा ४९२ जनाले अनुमति पाएका छन् । जसमा ३८७ पुरुष र १०५ महिला रहेका छन् । सगरमाथा आरोहणबाट मात्र सरकारले ७१ लाख ९७ हजार अमेरिकी डलर (करिब १ अर्ब ७ करोड ४० लाख रुपैयाँ) भन्दा बढी रोयल्टी संकलन गरेको छ ।
सगरमाथा बाहेक अन्य हिमालहरूमा पनि आरोहीहरूको उल्लेख्य सहभागिता देखिएको छ । जस अनुसार ल्होत्से (८५१६ मि.)– १२०, आमा दब्लाम (६८१४ मि.) मा १११, मकालु १ (८४६३ मि.) मा ७२, अन्नपूर्ण १ (८०९१ मि.) मा २७ जनाले अनुमति लिएका छन् ।
समग्रमा, यस सिजनको मे ८ सम्ममा हिमाल आरोहण अनुमतिबाट सरकारले कुल ८३ लाख ३५ हजार ९७१ अमेरिकी डलर (करिब १ अर्ब २४ करोड ४१ लाख रुपैयाँ) रोयल्टी प्राप्त गरेको छ ।
देशगत रुपमा हेर्दा चीन र अमेरिकाका सबैभन्दा धेरै आरोहीले अनुमति लिएका छन् । त्यसैगरी आरोहण अनुमति लिनेहरूमा ७९ देशका नागरिकहरू सहभागी छन् । जसमा सबैभन्दा बढी चीनबाट १४९ जना, संयुक्त राज्य अमेरिकाबाट १४८ जना, र भारतबाट ९५ जना रहेका छन् । अन्य प्रमुख देशहरूमा रुस (६९ जना), बेलायत (७४ जना) र जर्मनी (७१ जना) रहेका छन् । नेपालबाट पनि १९ जनाले विभिन्न हिमाल आरोहणका लागि अनुमति लिएका छन् ।
यस सिजनमा महिला आरोहीहरूको सहभागिता पनि उत्साहजनक देखिएको छ । कुल १,१३४ आरोहीमध्ये २७४ जना महिला रहेका छन् भने ८६० जना पुरुष रहेका छन् । पर्यटन विभागकी शाखा अधिकृत सुधा रेग्मीका अनुसार, यो तथ्याङ्क मार्च १ देखि मे ८, २०२६ सम्मको हो । यसले नेपाली पर्वतारोहण क्षेत्रमा कोभिडपछिको उत्साहलाई निरन्तरता दिएको देखिन्छ ।
