नेपाल र श्रीलंकाबीचको अन्तर्देशीय डिजिटल भुक्तानीलाई सरल र सुरक्षित बनाउने उद्देश्यका साथ नेपाल क्लियरिङ्ग हाउस लिमिटेड र श्रीलंकाको लंकापेबीच क्रस–बोर्डर क्यूआर भुक्तानी सेवा औपचारिक रूपमा सुरु भएको छ ।
श्रीलंकाको कोलम्बोमा आयोजित एक विशेष समारोहमा नेपाल राष्ट्र बैंक, सेन्ट्रल बैंक अफ श्रीलंका तथा दुवै देशका बैंक तथा वित्तीय संस्थाका वरिष्ठ प्रतिनिधिहरूको उपस्थितिमा यस ऐतिहासिक साझेदारीको संयुक्त घोषणा गरिएको हो । यस नयाँ व्यवस्थासँगै अब श्रीलंका भ्रमण गर्ने नेपाली पर्यटकहरूले कनेक्टआईपीएस वा अन्य मोबाइल बैंकिङ्ग एपमार्फत श्रीलंकामा रहेका ४ लाखभन्दा बढी लंकाक्यूआर मर्चेन्टहरूमा सहजै स्क्यान गरी वास्तविक समयमा भुक्तानी गर्न सक्नेछन् ।
यस सुरुवातलाई दक्षिण एसियाली देशहरूबीचको डिजिटल भुक्तानीको क्षेत्रीय अन्तराबद्धताका लागि एउटा महत्वपूर्ण कोशेढुङ्गाका रूपमा लिइएको छ । सुरक्षित र भरपर्दो माध्यमबाट हुने यस्तो कारोबारले दुई देशबीचको भुक्तानी इकोसिस्टमलाई थप सुदृढ बनाउने विश्वास गरिएको छ ।
नेपाल र श्रीलंकाबीच लामो समयदेखि कायम ऐतिहासिक, सांस्कृतिक तथा धार्मिक सम्बन्धलाई यस प्रविधिले थप प्रगाढ बनाउनुका साथै बढ्दो पर्यटन र व्यापारिक आदानप्रदानलाई समेत सहयोग पुर्याउने अपेक्षा गरिएको छ । विशेषगरी पर्यटक र व्यापारिक भ्रमणमा रहेका व्यक्तिहरूले अब नगद बोक्नुपर्ने झन्झट बिना नै सुरक्षित नगदरहित भुक्तानीको विकल्प प्रयोग गर्न पाउनेछन् ।
दुई देशका राष्ट्रिय भुक्तानी पूर्वाधारहरूबीचको यो समन्वयले साना तथा मझौला उद्यमहरूलाई समेत अन्तर्राष्ट्रिय ग्राहकहरूसम्म पुग्ने नयाँ अवसर सिर्जना गरेको छ । यो सेवा प्रारम्भिक चरणमा लक्ष्मी सनराइज बैंकले इस्युअर बैंकका रूपमा सुरु गरेको छ, जसअन्तर्गत बैंकका डलर कार्ड वा इन्स्ट्रुमेन्टहरूलाई कनेक्टआईपीएसमा लिंक गरी श्रीलंकामा क्यूआर भुक्तानी गर्न सकिनेछ । आगामी दिनमा अन्य मोबाइल बैंकिङ्ग एपहरूमा पनि यो सुविधा विस्तार गरिने योजना रहेको छ । समग्रमा, यो पहलले दुवै देशका डिजिटल वित्तीय सेवाहरूलाई समावेशी बनाउन र आधुनिक भुक्तानी प्रणालीको स्वीकार्यता बढाउन महत्वपूर्ण भूमिका खेल्ने देखिएको छ ।
