साउदी अरबमा निर्माणाधीन महत्वाकांक्षी ‘नियोम’ परियोजनाअन्तर्गतका केही ठेक्का बन्द भएपछि हजारौं नेपाली श्रमिक रोजगारी गुमाएर स्वदेश फर्किन थालेका छन् । परियोजनामा कार्यरत करिब ८० हजार नेपालीमध्ये ठूलो संख्या प्रभावित हुने अनुमान गरिएको छ ।
ट्रजेना स्की भिलेजमा मात्रै करिब तीन हजार नेपाली कार्यरत रहेको बताइएको छ । फर्केकाहरुका अनुसार अधिकांश श्रमिकलाई कम्पनीले स्वदेश फर्काइसकेको छ भने केहीलाई अन्य परियोजनामा सारिएको छ ।
नियोम परियोजना साउदी युवराज मोहम्मद बिन सलमानले सन् २०१७ मा ‘साउदी भिजन–२०३०’ अन्तर्गत घोषणा गरेका थिए । करिब ५०० अर्ब अमेरिकी डलर लागत अनुमान गरिएको यो परियोजनामार्फत पर्यटन, प्रविधि, उद्योग र हरित ऊर्जाको विकास गर्ने लक्ष्य राखिएको थियो ।
तर बढ्दो लागत, तेलको मूल्यमा गिरावट, क्षेत्रीय तनाव र सरकारी प्राथमिकतामा आएको परिवर्तनका कारण परियोजनाका केही ठेक्का रद्द तथा पुनर्संरचना गरिएको छ । यसले विदेशी श्रमिकहरूको रोजगारीमा प्रत्यक्ष असर परेको हो ।
यदि सबै नेपाली श्रमिक फर्किनुपरेमा नेपालले मासिक कम्तीमा २ अर्ब ३६ करोड रुपैयाँ बराबरको विप्रेषण गुमाउने जोखिम रहेको अनुमान गरिएको छ ।
