काठमाडौं । भारतको आसाम राज्यमा आएको बाढीबाट ठूलो जनधनको क्षति भएको छ। यस वर्षको बाढीमा परी मृत्यु हुनेको संख्या ८७ पुगेको अधिकारीहरूले बताएका छन्।
आसाम राज्य विपद् व्यवस्थापन प्राधिकरणका अनुसार शिवसागर, चराइदेव, जोरहाट, गोलाघाट, धेमाजी, लखिमपुर र विश्वनाथ जिल्ला बाढीबाट सबैभन्दा बढी प्रभावित भएका छन्। यी सात जिल्लामा १ लाख २८ हजारभन्दा बढी मानिस बाढीको प्रत्यक्ष प्रभावमा परेका छन्।
बाढी ३८० गाउँसम्म फैलिएको छ। बाढीका कारण हजारौँ मानिस विस्थापित भएका छन् भने करिब १४ हजार २३० हेक्टर कृषियोग्य जमिन डुबानमा परेको छ।
बाढीले घर, सडक, पुल तथा चौपायामा समेत ठूलो क्षति पुर्याएको छ। ग्रामीण क्षेत्रमा बाढीको प्रभाव अझ गम्भीर देखिएको अधिकारीहरूले बताएका छन्।
शिवसागर सबैभन्दा बढी प्रभावित
सात जिल्लामध्ये शिवसागर सबैभन्दा बढी प्रभावित भएको छ। त्यहाँ करिब ५५ हजार २०० जना बाढीको चपेटामा परेका छन्।
चराइदेवमा ३४ हजार ५० जना, जोरहाटमा २० हजार २०९ जना, गोलाघाटमा १० हजार २०१ जना र धेमाजीमा ८ हजार ३३३ जना प्रभावित भएका छन्।
आसामका केही क्षेत्रमा बाढीको अवस्था क्रमशः सुधार हुँदै गए पनि धेरै समुदायले अझै गम्भीर कठिनाइको सामना गरिरहेका छन्।
५५ राहत शिविर सञ्चालन
बाढी प्रभावितका लागि अधिकारीहरूले सात जिल्लामा ५५ वटा राहत शिविर तथा राहत वितरण केन्द्र स्थापना गरेका छन्। ती शिविरमा हाल ११ हजार ६६ जना मानिसले आश्रय लिइरहेका छन्।
घर छाड्न बाध्य भएका तथा बाढीका कारण दैनिक उपभोग्य सामग्री र आधारभूत सेवाबाट वञ्चित परिवारलाई आवश्यक सहयोग उपलब्ध गराउन राहत शिविर सञ्चालन गरिएको हो।
१ हजार १८० घरमा क्षति
बाढीबाट घर तथा अन्य संरचनामा पनि ठूलो क्षति पुगेको छ। अधिकारीहरूका अनुसार ८७८ वटा घरमा आंशिक क्षति पुगेको छ भने ३०२ वटा घर पूर्ण वा गम्भीर रूपमा क्षतिग्रस्त भएका छन्।
बाढीले आसामको ग्रामीण अर्थतन्त्रको महत्वपूर्ण आधार चौपायामा समेत ठूलो असर पारेको छ। कम्तीमा ३०१ वटा गोठ तथा छाप्रा क्षतिग्रस्त भएका छन्।
विपद्बाट करिब ३४ हजार ४७१ वटा पशु चौपाया प्रभावित भएको अधिकारीहरूले बताएका छन्। बाढीका कारण कृषि तथा पशुपालनमा परेको क्षतिले प्रभावित ग्रामीण परिवारको जीविकोपार्जनमा थप चुनौती सिर्जना गरेको छ।
