ल्हाक्पा गेलु शेर्पा
सोनोमा, क्यालिफोर्निया । क्यालिफोर्निया शेर्पा एसोसिएसन र हिमालयन शेर्पा क्लब अफ सोनोमाको संयुक्त आयोजना तथा सिटी अफ सोनोमाको सहयोगमा क्यालिफोर्नियाको सोनोमामा नेपालको रसुवा–भोटेकोशी क्षेत्रमा आएको विनाशकारी बाढीबाट प्रभावित परिवारहरूको राहत तथा सहयोगका लागि आयोजित कार्यक्रममा एक लाख अमेरिकी डलरभन्दा बढी रकम संकलन भएको छ ।
सेप्टेम्बर २२ मा सोनोमा भेटेरन्स मेमोरियल हलमा आयोजित ‘Sonoma for Nepal: A Flood Relief Charity Dinner’ मा सयौँ स्थानीय बासिन्दा, शेर्पा समुदायका सदस्य, नागरिक अगुवा, व्यवसायी, रेस्टुरेन्ट तथा वाइनरी सञ्चालक, स्वयंसेवक र बे एरियाका विभिन्न स्थानबाट आएका समर्थकहरूको सहभागिता थियो ।
नेपालका बाढीपीडितप्रति सहयोग र ऐक्यबद्धता व्यक्त गर्ने उद्देश्यले आयोजित कार्यक्रमले हजारौँ माइल टाढा विपत्तिमा परेका नेपाली समुदाय र उत्तरी क्यालिफोर्नियामा बसोबास गर्ने नेपाली तथा स्थानीय समुदायलाई मानवीय सहयोगको साझा उद्देश्यमा एक ठाउँमा जोडेको थियो ।
संयुक्त राज्य अमेरिका र नेपालको राष्ट्रिय गानबाट सुरु भएको कार्यक्रममा हलभरि सजाइएका रंगीचंगी बौद्ध प्रार्थना ध्वजाले हिमाली संस्कृति र परम्पराको झल्को दिएका थिए । ङवाङ शेर्पाले सञ्चालन गरेको कार्यक्रममा बाढीपीडितप्रति ऐक्यबद्धता, सांस्कृतिक अभिव्यक्ति र मानवीय सहयोगको भावना प्रतिविम्बित भएको थियो ।
कार्यक्रममा शेर्पा समुदायका सदस्यहरूले बाढीमा ज्यान गुमाएकाहरूको सम्झनामा बौद्ध परम्पराअनुसार प्रार्थना गरेका थिए । मृतकप्रति श्रद्धाञ्जली अर्पण गर्नुका साथै आफन्त गुमाएका परिवार, विस्थापित समुदाय तथा घर, सम्पत्ति र जीविकोपार्जनका आधार गुमाएका प्रभावितहरूको सुरक्षा, स्वास्थ्य र पुनर्स्थापनाको कामना गरिएको थियो ।
सोनाम जाङ्बु शेर्पाले नेपालमा बाढीले निम्त्याएको विनाश र प्रभावित समुदायको अवस्था समेटिएको भिडियो प्रस्तुत गरेका थिए । बाढीले क्षतिग्रस्त बस्ती, संरचना तथा प्रभावित परिवारका दृश्यहरू पर्दामा देखिँदा हलको वातावरण केही समय गम्भीर र मौन बनेको थियो । ती दृश्यले विपत्तिसँग जोडिएका तथ्यांक र संख्याभन्दा पछाडि रहेका वास्तविक मानिस, परिवार र समुदायको पीडालाई उपस्थित सहभागीसमक्ष जीवन्त रूपमा प्रस्तुत गरेका थिए ।
कार्यक्रममा बे एरियाका विभिन्न स्थानबाट आएका मानिससँगै ठूलो संख्यामा सोनोमाका स्थानीय बासिन्दाको पनि सहभागिता थियो । उपस्थितिको चापका कारण हल पूर्ण क्षमतामा पुगेपछि ढिलो गरी आइपुगेका केही शुभेच्छुक तथा समर्थकहरू भित्र प्रवेश गर्नसमेत नसकेको आयोजकहरूले बताएका छन् ।
हजारौँ माइल टाढा नेपालमा आएको विपत्तिप्रति देखिएको यो सहभागिताले राहत अभियान नेपाली समुदायमा मात्र सीमित नरही सोनोमाको स्थानीय समुदायसम्म विस्तार भएको देखाएको थियो ।
कार्यक्रममा सोनोमाका मेयर रोन वेलान्डर, पूर्वमेयरहरू, स्थानीय सामुदायिक अगुवा तथा अमेरिकी प्रतिनिधि माइक थम्पसनको कार्यालयका प्रतिनिधिसमेत सहभागी थिए । उनीहरूको उपस्थितिले वर्षौंदेखि सोनोमामा बसोबास गर्दै आएको शेर्पा समुदाय र स्थानीय समुदायबीच विकसित सम्बन्धलाई समेत प्रतिबिम्बित गरेको थियो ।
कार्यक्रमलाई सम्बोधन गर्दै मेयर वेलान्डरले शेर्पा समुदायको योगदान र प्रभाव सोनोमा उपत्यकामा मात्र सीमित नरहेको बताए । उनले शेर्पा समुदायको उदारता, आतिथ्य र अरूलाई सहयोग गर्ने संस्कारको चर्चा गर्दै वास्तविक आवश्यकता पर्दा समुदायहरू एकजुट भएर अघि बढ्नु महत्त्वपूर्ण हुने बताए ।
“वास्तविक आवश्यकता पर्दा हाम्रो समुदाय एकजुट भएर सहयोगका लागि अघि बढ्छ,” उनले भने ।
क्यालिफोर्निया शेर्पा एसोसिएसनका अध्यक्ष गोम्बु शेर्पाले नेपालमा आएको बाढीले पुर्याएको मानवीय तथा भौतिक क्षतिको चर्चा गर्दै राहत अभियानमा सहयोग गर्ने दाता, प्रायोजक, स्वयंसेवक र समुदायका सदस्यहरूप्रति आभार व्यक्त गरे ।
उनले कार्यक्रम सफल बनाउन सहयोग गर्ने सिटी अफ सोनोमा, सोनोमा काउन्टी, स्थानीय समुदाय, व्यवसायी, रेस्टुरेन्ट, वाइनरी तथा स्वयंसेवकहरूको भूमिकाको पनि उल्लेख गरे ।
राहत अभियानमा स्थानीय समुदायको सहभागिता आर्थिक सहयोगमा मात्र सीमित थिएन । स्थानीय रेस्टुरेन्टहरूले भोजन उपलब्ध गराएका थिए भने सोनोमा तथा आसपासका क्षेत्रका वाइनरी, व्यवसाय र प्रायोजकहरूले विभिन्न किसिमका सहयोग गरेका थिए । स्वयंसेवकहरूले कार्यक्रम व्यवस्थापनदेखि सहयोग संकलनसम्मका विभिन्न जिम्मेवारी सम्हालेका थिए ।
परम्परागत पोशाकमा सजिएका शेर्पा समुदायका सदस्यहरूले दाता तथा प्रायोजकहरूलाई सम्मान र कृतज्ञताको प्रतीकस्वरूप सेतो खादा अर्पण गरेका थिए । अमेरिकी र नेपाली झण्डा, बौद्ध प्रार्थना ध्वजा, परम्परागत पोशाक र खादा संस्कृतिको उपस्थितिले कार्यक्रमलाई मानवीय सहयोगसँगै हिमाली सांस्कृतिक पहिचानसँग पनि जोडेको थियो ।
हिमालयन शेर्पा क्लब अफ सोनोमा र क्यालिफोर्निया शेर्पा एसोसिएसनले नेपालमा प्राकृतिक विपत्ति पर्दा यसअघि पनि विभिन्न राहत तथा मानवीय सहयोग अभियान सञ्चालन गर्दै आएका छन् । सन् २०१४ को सगरमाथा हिमपहिरो र सन् २०१५ को विनाशकारी भूकम्पपछि पनि समुदायका सदस्यहरूले राहत तथा सहयोग परिचालन गरेका थिए ।
उत्तरी क्यालिफोर्नियामा शेर्पा भाषा, संस्कृति, सम्पदा र परम्पराको संरक्षण तथा प्रवर्द्धनसँगै विपत्तिका समयमा मानवीय सहयोग जुटाउनु उनीहरूको सामुदायिक गतिविधिको एउटा महत्त्वपूर्ण पक्ष रहँदै आएको छ ।
हिमालयन शेर्पा क्लब अफ सोनोमाका अध्यक्ष पेम्बा शेर्पाले नेपालबाट हजारौँ माइल टाढा रहे पनि मातृभूमिसँग समुदायको सम्बन्ध उत्तिकै गहिरो रहेको बताए ।
“हामी विदेशमा बसे पनि हाम्रो मन सधैँ नेपालसँग जोडिएको हुन्छ, विशेषगरी कठिनाइ र आवश्यकताको समयमा,” उनले भने ।
उनले राहत अभियानलाई बाढी प्रभावित परिवारहरूप्रतिको ऐक्यबद्धता र सहयोगको अभिव्यक्तिका रूपमा उल्लेख गर्दै कार्यक्रम सफल बनाउन योगदान गर्ने दाता, प्रायोजक, स्वयंसेवक र समर्थकहरूप्रति आभार व्यक्त गरे ।
आयोजकहरूका अनुसार अभियानबाट हालसम्म एक लाख अमेरिकी डलरभन्दा बढी रकम संकलन भइसकेको छ । सहयोग संकलन अभियान सेप्टेम्बर २०२६ को अन्त्यसम्म जारी रहने भएकाले कार्यक्रममा उपस्थित हुन नसकेका व्यक्तिहरूले पनि सहयोग गर्न सक्नेछन् ।
अभियान सम्पन्न भएपछि संकलित अन्तिम रकम यकिन गरी क्यालिफोर्निया शेर्पा एसोसिएसनमार्फत नेपाल सरकारको प्रधानमन्त्री दैवी प्रकोप उद्धार कोषमा हस्तान्तरण गरिने आयोजकहरूले बताएका छन् ।
सोनोमामा आयोजित उक्त कार्यक्रम आर्थिक सहयोग संकलनमा मात्र सीमित रहेन; यसले नेपाल र अमेरिकामा रहेका दुई समुदायबीचको सम्बन्ध, सहकार्य र मानवीय संवेदनाको फराकिलो चित्रसमेत प्रस्तुत गर्यो । एउटै मञ्चमा रहेका नेपाल र अमेरिकाका राष्ट्रिय झण्डा, दुवै देशका राष्ट्रिय गान, बौद्ध प्रार्थना, हिमाली संस्कृति र स्थानीय अमेरिकी समुदायको सहभागिताले कार्यक्रमलाई विशेष स्वरूप दिएको थियो ।
हजारौँ माइल टाढा रसुवा–भोटेकोशीमा आएको बाढीले सोनोमामा सयौँ मानिसलाई एउटै उद्देश्यमा एकत्रित गर्यो । आर्थिक योगदानसँगै प्रार्थना, संस्कृति, मित्रता र सामूहिक सहभागितामार्फत पीडितहरूप्रति व्यक्त गरिएको साथले एउटा स्पष्ट सन्देश दिएको थियो, भौगोलिक दूरीले समुदायलाई टाढा राख्न सक्छ, तर मानवीय संवेदना र सहकार्यले उनीहरूलाई एकअर्कासँग जोडिराख्न सक्छ ।
– सबै तस्बिरहरू हिमालयन शेर्पा क्लब अफ सोनोमाको सौजन्यमा ।
