एजेन्सी– अमेरिकी राष्ट्रपति डोनाल्ड ट्रम्पले इरानले आफ्ना नागरिक वा सम्पत्तिमाथि हमला गरे इरानका ५२ स्थानमा हमला गरी ध्वस्त बनाइदिने चेतावनी दिएका छन् ।
इरानको इस्लामिक रेभोलुसनरी गार्ड्स कर्प्स (आईआरजीसी) अन्तर्गतको कुद्स फौजका जर्नेल कासिम सुलेमानीको अमेरिकी ड्रोन हमलामा मृत्यु भएसँगै अमेरिका र इरानबीच द्वन्द्व बढेको छ ।
इरानले सुलेमानीको हत्याको बदला लिने चेतावनी दिएको छ । अमेरिकाले आफूविरुद्ध आक्रमणको योजना बनाएको भन्दै सुलेमानीमाथि कारबाही गरेको बताएको छ ।
ट्रम्पले ट्वीटरमा लेख्दै इरानले बिना कुनै संकोच अमेरिकी हमलाको तयारी गरिरहेको बताएकोले आफूहरुले पनि इरानको ५२ वटा स्थानलाई लक्ष्य बनाइसकेको बताएका छन् । उनले ५२ स्थानमा इरानका निकै महत्वपूर्ण र एतिहासिक स्थानहरु पर्ने पनि उल्लेख गरेका छन् । ‘यदि इरानले हमला गरे हामी पनि निकै छिटो र घातक रुपमा आक्रमण गर्नेछौं,’ उनले लेखेका छन्, ‘अमेरिका धम्की सुन्न चाहँदैन ।’
इरानका सर्वोच्च नेता आयातोल्लाह खामेनीले अमेरिकासँग इरानी सेनाका कमाण्डर जर्नेल कासिम सुलेमानीको हत्याको बदला लिने बताएका छन् । नेता खामेनीले अमेरिकाविरुद्धको लडाइँ जारी रहने पनि बताएका छन् ।
